काठमाडौं । कक्षा १२ को पढाइ सक्ने बित्तिकै यदि आईटीमा आफ्नो दखलता बधुना चाहने  र सूचना प्रबिधिलाइ आफ्नो करियर बनाउन चाहने  थुप्रै विद्यार्थीहरु यतिखेर उपयुक्त कलेज र कोर्षको खोजीमा छन् । विभिन्न विश्वविद्यालय अन्तर्गत अनेक कोर्षहरु सञ्चालनमा रहेको अहिलेको अवस्थामा उपयुक्त निर्णय लिनु विद्यार्थी तथा अभिभावकहरुलाई वास्तवमा दुविधाकै विषय बनेको छ । 

 नेपालमा उपलब्ध आईटी कोर्ष र अध्यापन गराउने  कलेज तथा विश्वविद्यालय अन्तर्गतको कस्तो शैक्षिक कार्यक्रम सञ्चालनमा छ भन्ने विषयमा बताउँदै छौं । 

त्यसो त अहिले आईटी विषय विज्ञान प्रविधि तथा इन्जिनियरिङको विषयको रुपमा मात्र सीमित छैन । शिक्षा, व्यवस्थापन र मानविकी संकाय अन्तर्गत समेत आईटी पढाई हुन थालेको छ । 

१. त्रिभुवन विश्वविद्यालय

विश्वविद्यालय त्रिभुवन विश्वविद्यालय आईटी पढाउने कलेज र हरेक कोर्षको संख्याका हिसाबले  सबैभन्दा अगाडि छ । यस बिश्वबिधालय अन्तरगत  देशभर १७७ क्याम्पसमा विभिन्न विषयका आईटी विषयका कोर्षहरुको पढाइ भइरहेको छ । 

यसमा शिक्षा संकाय अन्तर्गतको बीआईटी बीएड, मानविकी संकाय अन्तर्गतको आईसीटी बीसीए, व्यवस्थापन संकाय अन्तर्गतको बीआईएम, विज्ञान तथा प्रविधि संकाय अन्तर्गतको  बीआईटी तथा बीएससी सीएसआईटी र इन्जिनियरिङ संस्थान अन्तर्गतको इलेक्ट्रोनिक्स, कम्युनिकेसन एण्ड इन्फरमेसन र कम्प्युटर इन्जिनियरिङ विषय रहेका छन् । 

२. काठमाडौं विश्वविद्यालय 

काठमाडौं विश्वविद्यालय अन्तर्गत बीई, बीएसई इन कम्प्युटर साइन्स र बीबीआईएस गरी तीन वटा आईटी कोर्ष पढाई हुँदै आएको छ । आईटीमा सम्बन्धनप्राप्त अन्य कलेज नरहेको काठमाडौं विश्वविद्यालयले केन्द्रीय विभागमै यी कोर्षहरुको अध्ययन अध्यापन गराउँदै आएको छ । 

३. पोखरा विश्वविद्यालय

पोखरा विश्वविद्यालय आईटी विषयका कोर्षहरु सञ्चालन गर्ने विषयमा मुलुकमै दोस्रो स्थानमा छ । जस अन्तर्गत बीसीए, बीई कम्प्युटर, बीई एलेक्ट्रिकल एन्ड इलेक्ट्रोनिक्स, बीआईटी, बीई सफ्टवेयर र बीई इलेक्ट्रोनिक्स एन्ड कम्युनिकेसन विषयको पढाई हुने गरेको छ ।

पोखरा विश्वविद्यालय अन्तर्गत आईटी कोर्ष सञ्चालन गर्ने कलेजहरुको संख्या १८ रहेको छ ।

४. पूर्वाञ्चल विश्वविद्यालय

आईटी विषयको अध्ययन अध्यापनमा पूर्वाञ्चल विश्वविद्यालय तेस्रो स्थानमा आउँछ । विश्वविद्यालय अन्तर्गत विज्ञान तथा प्रविधि संकाय र इन्जिनियरिङ सङ्काय अन्तर्गत आईटी कोर्ष सञ्चालनमा छन् ।

जसमा बीसीए, बीआईटी, इलेक्ट्रोनिक्स एन्ड कम्युनिकेसन र कम्प्युटर इन्जिनियरिङ रहेका छन् । पूर्वाञ्चल विश्वविद्यालय अन्तर्गत हाल १३ वटा कलेजमा आईटी विषयको पढाई हुँदै आएको छ । 

५. विदेशी विश्वविद्यालय

नेपालमा स्थानीय विश्वविद्यालय मात्र नभएर अन्तर्राष्ट्रिय विश्वविद्यालयका आईटी कोर्षहरुको अध्ययन अध्यापन हुने गरेको छ । यस्ता कलेजहरुको संख्या १२ वटा रहेका छन् ।